番薯記持台灣詩

康原書寫在地記憶

《番薯記持台灣詩》是阮第六本的台語詩集，用現代詩去寫歷史佮文化的詩，阮的詩佮蔡慶彰教授的圖去表現台灣歷史，蔡教授的圖內容真正精彩。圖像表達的內容，佮阮這幾年佇彰化推動常民歷史的寫作，有仝款的觀點，伊用圖像來記錄歷史，這圖像予人感覺有詩味的情景。一張圖配一首詩，攏總有九十首詩的創作。大約加分成四輯：第一輯「番薯的記持」，佇第一首〈番薯的記持〉阮按咧寫：
插過　六款以上旗仔的
番薯園　毋知為啥拚生死
青龍吐珠變紅日
黃虎攑旗來抗議
車輪輾過基隆港
挵死真濟台灣人
……

這首詩寫出台灣的命運，有咱這塊土地長期受殖民統治的無奈，這是這塊土地的歷史。這輯攏總二十二首，對古早的平埔年代開始，到近年來台灣人的常民生活記錄，像講:：寫著大肚王、台灣鹿仔的消失、劉國軒殺害沙轆社、鴨母王反清、紅毛城、消失的papora、番仔田夜祭、平埔族的徙岫、唐山過台灣、蔡牽的故事、林獻堂佮台灣文化、綠島的政治犯、二二八事件等，遮攏是台灣人深沉的記持。

第二輯「作家佮土地」，這輯有二十五首，寫著台灣作家賴和、吳濁流、楊逵、鍾理和、呂赫若、葉石濤、陳千武、林雙不等作家，這作家的作品，攏是以台灣的歷史佮土地為創作主題，表達出台灣人的精神。阮是按咧寫賴和〈走街仔先〉佮吳濁流〈無花果佮台灣連翹 〉：
媽祖佮關公的化身
行佇　台灣的大街小巷
解救　奴隸的奴隸
走街仔先　攑真得慘的
彼支秤仔　秤著
世間公理佮正義

這輯，另外加上阮2021年做彰化師大駐校作家時，所創作關於白沙山莊的詩，佮阮描寫故鄉三林港的一寡地景的史詩，對這輯也會使看出作家的創作佮土地的關係。

第三輯「台灣茶佮山」，這輯攏總十八首，這輯有寫台灣產業，有關台灣茶米的詩，台灣茶米是咱重要的產業，但佇台灣講著茶文化，攏咧講中國茶的故事，所以阮希望愛茶的人，透過茶會、猶是研究茶事、茶藝師的檢定考試，來推廣台灣人的茶文化，陳玉婷老師是國際大觀人文茶道書院負責人，定定佇上課的時，講台灣茶農咧講的俗語，親像伊定講的茶俗語有：「鼻落知芳，啉落知甘，芳袂使秤，甘袂使量，文章風水茶，盡捌無幾个。／掂斗、蟾蜍皮、蔭豉仔氣、煏孤箸。／做茶著愛芳氣掜有牢苦澀走有離，曷若做無好就變做芳氣走有離苦澀掜有牢。／恁這用高山茶咧做紅茶，曷毋就龍蝦礤簽--拍損／恁這茶色是媠，曷毋過穿兵仔衫─青迸迸。／澀盡七分芳，苦退十分甜。」這是咱台灣茶農定定咧講的言語；逐年in的茶藝師檢定考試，阮攏也去為in的學員上一个文化專題〈茶諺茶詩歌佮文化〉的課程，帶學員認識台灣茶的歷史佮文化，所以佇這輯內底收入阮寫的茶詩：台灣茶、茶園的歌聲、武界論茶、茶園問禪、泡茶、山中茶話等詩。

近年來阮真積極佮陳玉婷老師合作，想欲建構屬於台灣茶的主體文化，伊嘛出過一本《一即一切》的茶道的冊，講一寡泡茶佮茶器的代誌，佮伊的人生哲學，阮為伊的書寫〈茶佮詩〉的新詩佮四句聯：
用壺泡練功夫　進入
碗泡　用茶寫詩
參禪悟道个　哲學
溫佇注奉个　人生
風佮雲踮山中　相會
茶水佮禪詩　合一
一塊碗　一个世界
一葉茶　一款人生

〈茶佮詩〉的四句聯
玉婷請我去啉茶　四秀一定著愛提
伊講腹肚咕咕叫　食茶配話愛相招
茶中自有情詩味　毋免上山去揣詩
風雨飄來烏暗暝　天頂嘛看有天星
茶壺杯仔相借問　啥物時陣天會光
詩人茶農踮仝莊　茶園是日頭眠床

這輯內底閣有寫著台灣的玉山、阿里山、八卦山、溪頭、大肚山、武界等台灣有歷史意義的地景。猶有台灣特殊意義的動物、鳥仔類，『台灣藍鵲』的長尾山娘，代表恩愛翁某的鴛鴦、有象徵台灣人起家文化意義的土雞仔，這嘛是台灣人的常民的歷史文化。

第四輯「黃昏的故鄉」攏總有二十五首詩，有歷史意義的古蹟佮古厝：文武廟、台中火車站、路思義教堂、鹿港龍山寺、台中文學館、台中糖廠、旗津、梧棲漁港、蘭嶼、屏東勝利村軍眷區等，遮地景攏保留台灣人特殊的記持。猶有台灣人真正愛欣賞的景致淡水暮色、海邊的黃昏、高美濕地、老街的滷味、迎媽祖、漁港、台中公園、八卦山大佛，閣有台灣人攏真懷念的水牛、笠仔、白翎鷥、溪仔水等，透濫佇這輯內底，這輯的詩佮畫保留台灣人的常民生活情形。這本冊有「左圖右文」的設計，佇阮詩的意象中，有圖像的情景，佇圖像中會當讀出詩情的存在。詩佮圖嘛也當分開來欣賞，讀者也使用家己對詩中歷史的事件去分析，反省家己對過去發生過代誌的看法，藝術佮文學作品，攏是引起讀者去思考家己的人生價值，創作出本身的新觀念，這嘛是阮寫這本冊上期待的價值。